Norgga gádjunbálvalus


Norgga gádjunbálvalusa organiseren lea mearriduvvon geassemánu 22.b. 2015 gonagaslaš resolušuvnnain “Organisasjonsplan for redningstjenesten”.

Norggas leat maiddái riikkaidgaskasaš geatnegasvuođat mearra- ja áibmogádjunbálvalusaide mearriduvvon riikkaidgaskasaš soahpamušaid bokte main Norga lea oasálaš, das ee. SAR-konvenšuvdna (International Concention on Maritime Search and Rescue, 1979) ja ICAO-konvenšuvdna (Convention on International Civil Aviation,1944).

Gádjunbálvalus lea dat mii almmolaččat lea ásahuvvon danin ahte heahtedilis sáhttet moanat ovttasbargi oassálaččat gádjut olbmuid jápmimis dahje vahágis go leat leamaš lihkuhisvuođat dahje leat váralaš dilis, ja mii ii gula sierranasat ásahuvvon vástideaddjái dahje sierranas doibmii. Gádjunbálvalusas doibmet ovttas almmolaš ásahusat, eaktodáhtolaš organisašuvnnat ja priváhta doaimmat ja olbmot, ja man jođihit guokte váldogádjunbálvalusa ja daid vuollásaš guovllu gádjunguovddážat.

Gádjunbálvalus lea huksejuvvon čuovvovaš vuođđudeaddji prinsihpaide:

Ovttasbargoprinsihppa: Gádjunbálvalusas doibmet ovttas almmolaš ásahusat, eaktodáhtolaš organisašuvnnat ja priváhta doaimmat ja olbmot. Buot almmolaš ásahusat main lea kapasitehta, diehtu dahje gelbbolašvuohta mii heive gádjundoibmii, leat geatnegahtton oassálastit gádjundoibmii dainna kapasitehtain, gelbbolašvuođain ja fápmudusain mii dain lea. Ovttasbargoprinsihppa mielddisbuktá dan ahte buot oassálastiin lea iežas ovddasvástádus váfistit buoremus vejolaš ovttasbarggu sihke ráhkkanettiin ja go leat gádjunakšuvnnain.

Ovddasvástádusprinsihppa: Ásahusas mas beaivválaččat lea ovddasvástádus funkšuvdnii dahje doibmii, lea maiddái ovddasvástádus daid ovddas gádjunakšuvnnain, beroškeahttá viidodagas ja dan sivas.

Bálvalusa ovttaiduhttin prinsihppa: Gádjunbálvalus lea ovttaiduvvon bálvalus (integrerejuvvon bálvalus), mii mielddisbuktá dan ahte fátmmasta buot lágan gádjunakšuvnnaid nannámis, mearas ja áimmus.

Koordinerenprinsihppa: Váldogádjunguovddážat ja dan vuollásaš guovllu gádjunguovddážat koordinerejit sihke ráhkkaneami ja gádjundoaimma.